Ad nuγal s iẓuran

Ad nuγal s iẓuran

Ilindi, kra n wussan kan seg mi immut Ariel Sharon, lliγ qqareγ yiwen umagrad id-ittwarun fell-as deg uγmis New York Times. D aneγmas Ethan Bronner i t-id yuran. Tudart-is akw tettwamel-d iγil iγil. Mi-d ewweḍ ar twacult-is, inna-d kra n temsal iyi svaten imi lliγ ur ten ssineγ ara ama fell-as ama γef tmurt-is s umata.

Inna-d d akken Sharon d isem-is amaynut acku ibeddel-it. Illul-d d Ariel Scheinerman deg useggass 1928. Vava-s d Samuel, yemma-s d Vera Schneirov id-yusan si tmurt n Rruss.

Deg useggass n 1947 illa ixeddem i Haganah di tizi n Sharon.  S yina ihi id-ewwi isem-agi ines amaynut imi Sharon, macci am Scheinerman, d isem uday.

Syina ihi aneγmas n New York Times ifka-d kan cwiṭ n wawal γef usentel-a. Innad  d akken di tmurt n Israyel tella-ad tamsalt agi uveddel n ismawen d tin n medden irkelli. Am akken rran ak wudayen id-yusan si turuft neγ sanda nniḍen ad uγalen d udaynin ilqayanen. Γursen nutni imiren aveddel n isem d asired n wayen yumsen, am akken ad ksen ilefḍan. Am akken rran ak ad d-âiwden talalit. D agdud amaynut s tmuγli tamaynutt di tmurt tamaynutt d-ssalin seg ulac.

Ama d adavu ihi ama d  ayen illan d azayez (am lâesker) ama gar medden, kra n win ijjan isem-is ur nelli d isem uday, ttwalin medden s nqar n tiṭ. Qqaren fell-as yugi tidett d izuran. Akka ihi  i yuγalen ssawḍen wudayen rran akw ismawen nsen d udayen. D tuγalin s izuran.

Akken d-tella taluft, tamurt n Israyel tessali-d tasartit n uveddel n ismawen. Tessefses i medden anect-a u teṭṭef asen afus diγen akken ur ttajjan ara ismawen d-wwin yid sen si tmura tiwardanin am wid n turuft. Atnin kra imedyaten n udayen ittwasnen iveddlen ismawen nsen di tallit nni n tlalit uwanek uday: David Gryn yuγal d David Ben Gurion, Shimon Persky yuγal d Shimon Perez, Yizhak  Jazernicki yuγal d Yizhak Shamir,  Golda Meyerson tuγal d Golda Meir.

Udayen n imiren d isehyyuniyen, d wid irran ad uγalen ak wudayen umaḍal ar tmurt nsen n zik, Palistin. Aqerruy nsen di Turuft d Theodor Herzl yuran γef uwanek uday send ad d-ilal. Ussan nni udayen ccantt d tarzagat di tmura turufiyin. Ulac anida ur vedden ara γursen medden s miḥyaf neγ anida ur ttwaâezlen ara. Dγa ismawen nsen d agellid n Habsburg Yusef wis-sin  isen ifkan ismawen  s ufus iqeddacen is. Dγa myal yiwen amek is d-nfaḥ, wa sarsent γef tmurt neγ tamdint anda izdeγ, wa d amek illa wudem-is. Ṭaqa seg sen ssersenten γef ayen illan ttuqiment di tudart d amahil.

Anect-a issaweḍ iyi-d awen iniγ ayen vγiγ ad teẓrem fell-aneγ: teḍra yidneγ am udayen n Turuft: ssarsen aγ Irumyen akken isen d-nfaḥ i iqeddacen nsen illan kkaten iqerray nsen ar tmurt. Neγ ahat d Irumyen ittwalin aqvayli d aγersiw kan am wiyaḍ. Akka ihi id-nufa teccur tettuseqqa s Imuḥemmaden d Ben wa d Uld wihin. Ssnaγ medden s teqvaylit tawacult nsen ssawalen as At Ugni maca ssarsenten Ben Muḥemmad. Neγ At Tiγilt rsen Uld Elḥajj. Llan diγen akw At uγalen d Ait, U uγalen d Uld d Ben. Xarrtum ulac win zeglen gar aneγ am akken ayen ur nelli d aârav negγ d afransis dirit. Ayen illan d aqvayli kan yussa asen-d am akken icarcar.

Maca, wissen ihi ma d-yaweḍ wass, ula d nekni, a nuγal a nessired ilefḍan, a nekkes ṣrar iγ icemten akken a nuγal ar wayen nella, ad nili d nekwni. Ad nuγal s iẓuran.

Win irran ad inadi amek ggan Wudayen ad ivdu da: http://en.wikipedia.org/wiki/Hebraization_of_surnames

Share This Post

3 Comments - Write a Comment

  1. Tagi d tikti yelhan, issefk a nveddel, a neg ismawen yesεan talγa n tutlayt nneγ, macci s imesli ajenṭaḍ ara nili, ulama tura nezmer a nesεu takerḍa n teqvaylit, maca d tikti n tuγalin ar iẓuran i iwulmen, amedya macci (Raveḥ Nat Σli Waεmer) ilaq: Aksil Wedrar.

    Reply
  2. kra yella kra yerna · Edit

    Irumyen akken isen d-nfaḥ i iqeddacen nsen illan kkaten iqerray nsen ar tmurt. Neγ ahat d Irumyen ittwalin aqvayli d aγersiw kan am wiyaḍ.awah a mmis n tmurt,anect aggi yakkw i wakken ad sefdhen amzruy nnegh ,a teren kkan yevda seg asmi idd yewedh l’islam d waeraven gher tamazgha.mi tesfedhedh amzruy n wegdud,tzemredh imir as teddemedh ayla s,a ma d’akal,tutlayt ,negh d’adles.mi terigh ,am teqsit ni n muhand u caevan n mohya,yeggura dd meskkin e3ariyan!

    Reply
  3. Azul
    Tamezwarut ad inigh tanmirt s wattas i win di d yuran aya, tanmirt i leqdic n wen

    Am assa Tamurt n Leqvayel ad tughel ger ifassen nnegh. Ad nilit ger annegh kan .Ihi tadukli d ttegmatt ad xyawin gher tafat.
    Ttfet deg usirem akwed izuran.

    Tanmirt

    Reply

Post Comment


*