D acu i d-yeggran deg izen n Summam ?

D acu i d-yeggran deg izen n Summam ?

Ugar n wezgen n lqern i yezrin γef temlilit n Summam, wissen ma a d-yemmekti udabu adzayri izen i as-d-yeğğa “Σebban d yemdukal-is”, ad as-yeg azal neγ ad as-yettara kan tidmi s wawal akken gan wid yezrin… Maca, akken kan tefra tegrawla, bdant tirga tefγent mxalfa; ayen nnan d wayen uran di tγerγert n Summam, yedmi-t waḍu.

20 γuct 1956 d asmekti n wegraw n Summam i d-yedran deg Ifri. D ass i-deg tella yiwet temlilit s wazal-is ger wid i selḥuyen tagrawla.
Yekker-d Σebban yewzen tilufa yefka-d rray n wegraw ara d-yessuken tamuγli γef i wacu tagrawla, d wamek ad as-neğğren abrid ilaqen akken a d-teglu s tifrat d tafat i tmurt.

Gan timlilit akken ad suken tiț γer deffir ad ẓren anda yessaweḍ umennuγ, tayeḍ γer zdat ad walin rray d imenzayen γef ara teddu tmurt ma ara tawi timunent :
- Segmen-as udem akken bγan ad tt-ẓren nutni d tustiwin n uzekka.
- Gerzen-as tikli akken ur tleḥḥu s tizelgi.
- Rran-tt d tamurt ara yeddun s leεqel d lmeεqul deg-s ad tezwir tsertit iγil.
- Rran-tt d tamurt ara d-ilhun s tlufa-s zdaxel qbel ad tḍil berra i tlisa.
- Rran-tt d tamurt n tugdut yettqadaren tikta.
- Rran-tt d tamurt n tikli γer zdat mačči γer deffir…

Maca, akken kan tefra tegrawla, bdant tirga tefγent mxalfa; ayen nnan d wayen uran di tγerγert n Summam, yedmi-t waḍu. Ayen iḍerrun ass-a, d ayen-nniḍen!
Acku wid akk i tt-iseddan seg ul, win ur nettwanγa yettwanfa imi d wid yellan seg berra i d-yegubren akersi.
Teγli-d tmurt ger ifassen-nnsen. Nefḍen tasertit smenyafen leḥkem n uεsekri, ugin tugdut bnan-t s yiwen ukabar kan…

53 n iseggasen i yεeddan γef tmenγiwt n Σebban n wergaz i d-ineğğren abrid i tegrawla; tiktiwin-is mazal yettili-d wawal fell-asent di tallit n wass-a.
Гas nγan Σebban ass n 27 dujember 1957, tiktiwin i d-yeğğa ggrent iẓuran di tmurt. Mγint-d deg irebbi n tsuta n wass-a ! D ay-agi i d-yessakin imdebren iqburen qqaren “ Σebban yexdeε agraw n Summam yeffeγ i webrid n teγri n tegrawla n 54”. Iγisi i d-ibanen gar-as d yemdukal n umennuγ γef timunent iqqen γer yizen yellan ger tgejda yettwarun di tγerγert n summam d win yefkan tikli n tidet i tegrawla, amek ara teddu tmurt n uzekka.

Ass-a 54 n iseggasen i yεeddan, izen n Summam urεad yessaweḍ γer wanda sarmen wid i d as-ineğğren abrid yessufuγen γer wanda yefsa ujeğğig n tlelli.

 

Share This Post

Post Comment


*