Iḥarkiyen n 54-62

Iḥarkiyen n 54-62

D igumiyen, d ixabiten, d ivaxusen, macci d irgazen, macci d taqvaylit, at qarraḍin, tiquvac n Fransa, imuzal n Fafa, tixenfucin, iḥiqel, atg. Lḥasun ulac amek ur asen sawlen ara medden di ttrad n 54-62. Nutni, iḥarkiyen n 54-62, aṭas isrewten diγen di tudrin nneγ. Wa d ttar i t ewwin, wa d ṭṭmaâ. Kra d Fransa i ten iḥettmen u xxubten war levγi nsen.

Ihi xas macci d “irgazen” ar medden maca tugdi ugaden ten. Ccuren di lhiva imi zemren ad sfesden, zemren ad snegren tiwaculin akken ma llant. Ar assa aṭas n tmucuha id-iqqimen fell asen, γef ayen uqmen di yir tikliwin nsen. Ar assa n wussan, ṭṭfen asen medden ccaḥna imi mazal ddren wid iḥeḍren i wayen uqmen, i usexseṛ sxesṛen.

Di tama n wid yulin s adrar, igren irebbi i Fransa ur asen slufuyen ara. γunfan ten, γunzan ten γucen ten. D jenjar i tiṭ. Win id-iγlin gar ifassen nsen imzel, win id-iγlin zfad nnican nsen ittwanγa. Wa kksen as anzaren akken ad feḍḥen gar medden, wayeḍ ksen as iles akken ad sgugmen i levda. Medden irkelli ttwexiṛen fell asen amzun uḍnen ajejjiḍ.

Assmi tefra, aṭas seg sen i tugi Fransa. Tḍegger iten u ṭṭreḍqen gar ifassen n wid akken iten ittseggiden am umargu. Aṭas deg sen inγan di 62. Aṭas diγen seg sen i tewwi Fransa. Jjan tamurt nsen, imawlan d wid ak isen ittilin. Di Fransa âebban ten nutni d twaculin nsen di kra iâecwen amzun akk ur nnuγen ara γef Fransa. Ula d aman ulac iten deg addaren nsen. Fransa ihi ur ten teḥsiv ara d Irumyen u kra seg Irumyen, ula tagara yagi, am Georges Frêche, mazal ara rregmen deg sen nutni d tarwa nsen. Ar asen qqaren macci d imdanen kunwi u γef anect agi ur tuklalem ara udem neγ leqdar. D lvaṭel. Iḍelli ceyten nγan atmaten nsen assa ur âeddan ara. Uγalen macci d talsa gar wallen n wid i γef d-kkin iḍelli.

Maca, assa, neγ ahat azekka, ilaq neγ ur ilaq ad asen nanef i nutni d tarwa nsen ad d-kecmen ar tmurt taqvaylit? Tura nutni am akka i t-id nenna fernen Fransa maca xesṛen imi texseṛ Fransa ttrad. Ihi iḍelli nerna ten. Maca assa akken walaγ ilaq a neṭṭef avrid nniḍen u neḍleq i ccaḥnat neṭṭef almi d assa. Asen nsuref seg ul maca tamsirt id-lemden medden si twaγit nsen ur tγelli ara ar tmeẓẓuγt uaeẓẓug! Ad t err medden ad xemmen send ad kkren mgal atmaten nsen. D tawaγit ara issiwḍen medden ad erren taqejjirt mi ara d-ḥdar tizi n leḥris. Mawel, leqder nsen imi d imdanen illan am nekni, xas cḍen iḍelli, ikka nnig ccaḥnat. Issufek as neḍleq i taâkumt u asen nenni atan nsuref awen seg ul! Syin, kra n win seg sen ara ad issutren akken as nsuref ad s nelli tiwwura n tmurt ad ikcem. Acemmet deg umdan i levda i wacut ara, ur d-ittawi wara i tmura d iγerfan. Ula d Llalman d Uṛumi, kra iḍran gar asen uγalen assa s imeddukal. Ara xedmen afus deg fus imi ssawḍen zegren akk-in i ccaḥnat.

Share This Post

2 Comments - Write a Comment

  1. Win idan d Fransa d c&ul-is. Ullac smah iwid ifkan afus &ef tmurt: Win itt hasiwen &ef Igumiyen n leqbayel di Fransa, tayi d yiwet n taluft nidden…

    Reply

Post Comment


*