Muḥend Uharun (22-05-1996 / 22-05-2010)

Muḥend Uharun (22-05-1996 / 22-05-2010)

Muḥemed Uharun, ilul ass n 13 deg waggur n yibrir 1949, deg taddart n Tefrit deg Uqbu. D mmi-s n yiwet n twacult tagrawliwt, baba-s Tahar d amagru (sergeant) deg yigen n uslelli aɣelnaw (A.L.N), yeɣli deg unnar n yiseɣ di tegrawla n 1954, imrigen deg yifassen. Yemma-s nna Zahra texdem ula d nettat di tegrawla, tella tettawi aɛwin i yegrawliwen yellan deg udrar, akken diɣen i sent-tessawaḍ isallen ɣef ucengu arumi, ma d ɛemt-is Wardiya, d axxam-is ideg i d-yella Ugraw n Ssumam deg yifri awzellagen deg useggas n 1956.

Yesεedda temẓi-s gar lḥif d lmerta, maca werğğin yesres aqerruy-is, acku tagrawla tesselmad-as tirrugza d yinumak n ddunit. Ass mi yesmed 11 n yiseggasen di tudert-is, yekcem s aɣerbaz amezwaru n taddart-is, syin akin, yekcem ɣer uɣsur n tarwa n yimeɣrasen deg useggas n 1963, almi d aseggas n 1967.

Muḥend uharun yelli wallaγ-is i tmussni, yeẓwer aṭṭas, d ayen i t-yeğğan ad yezger krad yeswiren deg yiwen n useggas. Deg useggas n 1967, yekcem ɣer CNET n Sidi Σic, yufrar-d deg ulmud-is, d ayen i t-yessawḍen ɣer tseddawit n Lezzayer, dinna yeqqar, ixeddem, yerna yettnadi deg wayen i icudden ɣer tutlayt d yidles n tmaziγt, imi yeḥsa d akken tamaziɣt tuḥwağ tarwa-s, akken ad d-teffeɣ seg tilas, ilaq ad yebges fell-as send ad tt-yawi uḥemmal n tatut d nnger.

Deg useggas n 1970, yessufeɣ-d yiwet n tesɣunt “IṬIJ” s tuffra netta d yimdukal-is, i yellan deg Tuddsa n Wafuden Imaziγen, (Organisation des Forces Berbères), syin akkin yessufeɣ-d tasɣunt-nniḍen umi isemma “ATMATEN” akken ad yessaki imdanen ɣef temsalt n yidles d tumast tamaziɣt.

Muḥend uharun mačči kan d ameγnas, maca yugar aya, acku d yiwen i iqedcen deg waṭas n taɣulin, issefra, yura, inuda, iga isaragen, yexdem taklut, yerna isuqel luqran ɣer tmaziγt, yura ula d tussna s teqbaylit, akken ad d-yini d akken tutlayt-nneɣ diγen d tutlayt n tussna am nettat am tutlayin-nniḍen n umaḍal.

Deg waggur n yennayer 1976, yettwaṭṭef ɣef temsalt n lbumbat, neta d yimdukal-is (Metref, Baḥbuḥ, Cerradi, Crifi, Meğber …), ɣer usekref n TAZULT, anida i yesεedda 11 n yiseggasen d uzgen n lḥif d ccer, ala deg tira d tɣuri i yesεedday akud-is, tawaɣit-nniḍen i s-yesrezgen ddunit ugar, d tamettant n yemma-s ‘Nna Zahra” i yemmuten deg ubrid-is akken ad t-id-tẓer deg lḥebs, maca yir zher ur yektib ara ad tt-iẓer ulama i tikkelt taneggarut.

Ass n 5 di yulyu 1987, yeffeɣ-d si lḥebs, maca tikli-is deg ubrid i d-yewwi ur tt-yeğği-wara , iqeddec, yettnadi yessekfal-d tajaddit, akken diγen i imal ɣer tẓuri, dɣa yeffka tayri i tfelwiyin akk d unğar n usɣar.

Iṭṭij n Muḥemed uharun yexsi ass n 22 Maggu 1996, maca yeğğa-yaγ-d agerruj ɣlayen deg tmusni akk d tussna, tabɣest-is d umennuɣ-is d taɛwint ideg d-yettagem uɣref aqbayli, xas ass-a zzman yerra fell-as timedlin n tatut, maca isem-is yura deg umezruy s yisekkilen n wureɣ ara yettfeğğiğen am lefnar, akken d-yeqqar: “Yiwen n wass, Tafriqt n Ugafa ad tzux s tutlayt-is”, ihi sgunfu di talwit a yizem ur itettu umezruy !

Yaḥyun Lɛarbi
19/05/2010

 

Partager cet article

Post Comment

*