Taqbaylit d Umexzen, matta tamunt ? (Azgen amezwaru).

Taqbaylit d Umexzen, matta tamunt ? (Azgen amezwaru).

Taɣult n Umexzen ɣer tgemmi taferkit yefka-d anamek yaḍen i tsertit g ugafa n tefrikt nna d yuwin aseksew amaynu i takelsertit(1) n Tmazɣa. Ur nniɣ ad mmeslayeɣ ɣif umukris n “Uppuliẓaryu” neɣ win “Daεic” ula abuɣlu(2) adamsan g tmura n ddaw tnezruft, awettas-inew ad snileɣ amentil Aqbayli ilan azal-nnes g unrar agrakal(3); Aɣṛef Amaziɣ ittnaɣen ɣif tlelli-nnes, aha d ibibbi(4) n umexzen i taluft-nnes.

G useggwas 2001, deffir n tefsut taberkant, ukzen iqbayliten is ur yad illi usirem jaj(5) n uwanek n ijiniralen g Dzayer i wakken ad taf Teqbaylit d Tmaziɣt s umata uddur-nnes. Gan abrid i uswengem amselelli, s unamek-nnes asertan, is ur ttuɣulen imnebḍen ḍaṛt g yiẓiṛ-nnsen(6) i tmukrist n tamust g Dzayer. Ittumrara kigan wawal seg useggwas-a ɣif usekka n uɣṛef aqbayli d akw iɣeṛfan nniḍen illan d Imaziɣen d mimek ilaq ad swurrin ḥma(7) ad akzen Imaziɣen g Dzayer is ur yad illi yinef(8) n imentilen-nnsen mek ur lin iwanken-nnsen. Aseggwas n 2007 g iɣṛem n Yiɣil-n-Ɛli g tmurt n Iqbayliten, ilula-d yan umussu mi fkan assaɣ n “Timanit i Tmurt n Iqbayliyen” (MAK) innan ad ig ageṛḍ asertan n Iqbayliten akw ittnaɣen ɣif uzarug d tlelli n wegdud-nnsen.

Ggudin winna d tinna imedzen s tlalit n umussu-ya g tmurt-nnsen, Tamazɣa d akw g umaḍal s tikti d yuwey seg mayd iṭṭef umennuɣ n Imaziɣen abrid ur t-ittawin xes s ungar(9) g tmura g ttidiren. Maka, Dzayer iqqur iɣef-nnes g useqsi tt-ittaǧǧan ad tales i usbedd-nnes, tesdaddey, tessawed d tekref winna iletɣen(10) g tuddsa-ya.

Nnaɣen Iqbayliten ad yamez wawal abrid g ittakez umaḍal tabrat-nnsen, aɣulen s uyenna ittini uzref agraɣlan g tlufa n igduden iqbuṛen afella n ikalen g ttidiren.

Talalit n UNABAD AQBAYLI UΣḌIL, ittuskaren g Bariz g useggwas n 2010, yuwes kigan g usbuɣlu n umentil-a. Anaw Aqbayli ur isemmectig xes Imnebḍen g Dzayer i waḍu-nnes, isdaddey awd Amexzen acku taluft n Warrif ur ta ifukki wawal-nnes, iggwed ad d-aɣuIen Irifiten s yan wudem mi ur inni ad yiɣiy. G useggwas n 2015, yefka umgensas(11) n Umexzen i tmesmunt n tmura imunen yat tebrat g da issutur ad yili umrara n wawal ɣif umentil Aqbayli. Tasurift-a ur tt-d-yuwi uzwu imkinnaɣ, amukris n Uppuliẓaṛyu nna tusey Dzayer ayd ittegan arefti(12) i wesbuɣlu asertan d udamsan g umenẓaw(13) n tefrikt, imkinna ittini Umexzen. Imnebḍen g Meṛṛuk ur ta ufin inef i wseqsi n Tmaziɣt meqqar fkan udem i umaḍal nwis iga tisurifin iẓilen seg mayd iṣṣenṣeb tutlayt g tmenḍawt(14) n 2011, yurar kigan ɣifs i wakken ad inmili s Iqbayliten, igula-nn aweṭṭas-nnes. Amexzen ur as-iddi usekkin g umennuɣ-nnsen d imzagal akw d usenfaṛ(15) Aqbayli d yugmen g Timmuzɣa d yizri n uɣṛef Amaziɣ, netta asewlellu n Dzayer ayd t-ibrin. Aseggwas-a yaɣul Umexzen s tuddsa taferkit, taɣult-a tuwid kigan n tebratin iwinna mi ittini ” Icenga n tamunt tanamurt” g tammu Dzayer d wiyyaḍ.

G tagara, ad serseɣ aseqsi : matta wansa teṭṭef teqbaylit g tsmektit(16) n udabu ameṛṛuki deffir taɣult-nnes s tuddsa taferkit. G uzgen wiss sinn n umagrad-a ad snileɣ aseksew n Iqbayliten g yiwes-nnes seg uyenna ittini Unavad, rruɣ awal ɣif tsetratijiyt n Umexzen g umukris-a.

Amawal

(1)Géopolitique

(2)Développement

(3)Méditerranée

(4)Adoption

(5)Dedans

(6)Vision

(7)En vue

(8)Résolution

(9)Disparition

(10)Adhérer

(11)Représentant

(12)Entrave

(13)Continent

(14)Constitution

(15)Projet

(16)Agenda

Share This Post

Post Comment


*