Tikli n Ikurdiyen ɣer tlelli-nsen

Tikli n Ikurdiyen ɣer tlelli-nsen

I lmend n tmeɣra n useggas amaynut-nsen „Newroz“, mlalen 30000 Ikurdiyen/Tikurdiyin di Frankfurt am Main (Lalman) ass n 18.03.2017.

Frankfurt am Main tella trekkem s Ikurdyien, tettecruruq s wanayen ikurdiyen yettrefrifen dinna. Zzhir n ccna-nsen yekcem ula ɣer yexxamen. „Tilelli i weɣref akudi„ i ttsuɣun.

Tamsulta (police) tenna i yad yessudsen tikli, ur yessefk ara ad ẓren deg iberdan tiwlafin n Abdullah Öcalan neɣ anayen n ukabar „PKK“. Ma d Ikurdiyen i d-yewsan ɣer Frankfurt si yal tiqernit n tmurt n Lalman llan ur cliɛen ara deg wayen tenna temsulta.

Wwten-d daɣen s leqseḥ di tsertit n uselway n tmurt n Turk Recep Tayyip Erdogan. Ma d Erdogan netta yeɣli-d s rregmat ɣef udabu Alman. Yenna, acuɣer yeǧǧa Ikurdiyen ddan deg iberdan n Lalman, s tewlafin n Abdullah Öcalan. Ladɣa Erdogan yal ass d netta d rregmat di Angela Merkel, yenna Tameṭṭut-a d tanazit. Argaz-a am akken ur «yeẓri» ara d acu i d inaziyen yesserɣen uwdayen, yenɣan imelyan n yemdanen (di lgirra n 1939-1945).

Ikurdiyen sseknen-d i Walmanen, zemren ad ddun ɣef izerfan-nsen, mgal yad isersen azaglu fell-asen, war tiɣenddef, war amcaqlal akkd temsulta talmant.

Taggara n wass yal akurdi, (yal takurdit) yekcem s axxam-is s unecreḥ n wul.

Share This Post

Post Comment


*