Uguren n tkli n weɣref azwaw ɣer tlelli

Uguren n tkli n weɣref azwaw ɣer tlelli

“Kra yella, kra yerna”

Ayen yellan:

Imezwura-nneɣ ǧǧan-aɣ-d tamurt yelhan, tutlayt, tugdut akkd waṭas n tlufa nniḍen. Maca ur ɣ-d ǧǧin ara awanek ireṣṣan iḍaren-is di tmurt-nneɣ. Ur d-nufi ara anabaḍ, tawuri-ines tettili s tutlayt-nneɣ tayemmat Tamaziɣt-Tazwawt. Annect-a ikref-aɣ ifadden, nezga neqqim d igujilen gar iɣerfan n umaḍal.

Tamurt-nneɣ ṭṭfen-tt iberraniyen, sersen azaglu ɣef tarwa-s. Gezmen iberdan i tmusni di tmurt-nneɣ; meḍlen tidet; nɣan aṭas deg-neɣ, seg ifiniqiyen ar assa. Tamurt-nneɣ attan deg tegnit anida idles-nneɣ, tutlayt-nneɣ neggren cwiṭ cwiṭ, ma d amur ameqqarn n tarwa n tmurt-nneɣ ur yeẓri ara tawaɣit-a!

Adabu n Dzayer iberru-d kra i tmaziɣt, maca itekkes aṭas deg-s. Tutlayt Tamaziɣt qqaren-tt kra inelmaden deg iɣebazen am akken d tutlyat taberranit. Yernu mara a d-ffɣen seg iɣerbazen-a ur ttafen ara anida ara ad xedmen s tutlayt-a. Win/tin yuzzlen ad isggem tagnit, adabu a s-yini, atan yeffeɣ-d mgal-is. Akken nnan imezwura-nneɣ: “Yewwet-iyi, yeggul dg-i ur ttruɣ”.

Ssebbat n wannect-a mačči yiwet. Da yezmer ad yini yiwen akken nnan imezwura-
nneɣ: “Kra yella, kra yerna”. Mgal tagnit-a kkren-d aṭas n yirgazen/tilawin ttazzalen ɣef izerfan-nneɣ nekni s Yizwawen. D acu kan ma neqqim neqqar kan d azaglu yersen fell-aɣ i ɣ-yeǧǧan ur neddir ara d ilelliyen, dɣa a neqqim kan ntettru. Da yessefk a nẓer daɣen ayen nniḍen iyettcekkilen tikli i weɣref-nneɣ i wakken a nbeddel tagnit-a. Ihi yessefk a nesɛu tabɣest, a nwali udmawen-nneɣ di lemri, a nẓer d acu yessefk a t-nbeddel deg iman-nneɣ. Syin akin a ncemmer iɣallen, a neddu deg webrid ɣer tlelli.

 

Ayen yernan:

Aɣbel-nneɣ amezwaru yezmer ad yini yiwen d amur ameqqran n tarwa n tmurt-nneɣ ur n umin ara nekni s Yizwawen d aɣref i nella; ɣur-neɣ idles; amezruy akk d tutlayt am yal aɣref nniḍen. Aṭas n imezdaɣ n tmurt-nneɣ ur uminen ara tutlayt-nneɣ tezmer i tmusni, tezmer i tsertit, tezmer i yal taluft n tmeddurt n wass-a; tezmer ad tili d tutlayt n twuri (n lxudma).

Ar assa tutlayt-nneɣ mačči aṭas i tt-yettarun, i tt-yeqqaren. Annect-a ssebba-s tamezwarut yezmer yiwen a d-yini d tasertit n udabu n tmurt n Dzayer id-yesqenṣeln ad yessenger tutlayt tamaziɣt, ad yesbedd i tmurt ala tutlayt taɛrabt. D acu kan ula d nekni s yiman-nneɣ, ar ass-a ur nettak ara azal i tuklal tutlayt-nneɣ akken nezmer, ur neẓri ara d nettat i d tigejdit talemmast n yidles-nneɣ. D nettat i izemren ad tesdukkel tarwa n tmurt-nneɣ. Ula d yad yessnen tira-s, yal tikkelt regglen ɣer tutlayin nniḍen, qqaren tawuri s tmaziɣt-tazwawt mačči tura.

Llan yad yeqqaren daɣen: Asmi ara nesɛu awanek, ass-nni a naru s tutlayt-nneɣ. Ayetmaten-a tettun belli tutlayt-nneɣ tezmer ad tenger, war ma nessaweḍ a nesbed kra n wass tadsimant (timanit) neɣ awanek i tmurt-nneɣ. Acuɣer ulac tura kra n uselway n tɣiwant ara ad yerren tazwawt d tutlayt n twuri di tɣiwant-is? Xersun ad yessufuɣ ula d iccer-nni n lkaɣeḍ n umulli (extrait de naissance) s tezwawt. Ɣas ahat adabu ur t-yettaǧǧa ara ad yexdem annect-a, maca ad slen medden s wayen yexdem, a sen-yefkk amedya! Tarwa n tmurt am akken tennum tura ur tumin ara tutlayt-nneɣ tezmer i yal wayen izemrent tutlayin nniḍen. Amek ara ad yizmir weɣref ad yessali tamurt-is, war tawuri s tutlayt-is tayemmat?

Llan kra n Yizwawen a wi-d kan ad ččaren leǧyub-nsen s tedrimt; ad sɛun ṭumubilat ticebḥanin timeqqarnin; ad bnun srayat; ad ṛwun tuffẓa tissit; ad zhun. Yal tikkelt mara ad mlilen ameɣbun deg webrid-nsen, refden tanzarin-nsen fell-as.

Llan daɣen kra n Yizwawen yeqqaren, zik-nni uzlen, cerwen tidi ɣef tamaziɣt. Ma d tura d ayen faqen. Qqaren, aziɣ yad yerran iman-nsen ttazzalen ɣef tmaziɣt d azerreg kan. Irgazen-a yezmer a sen-yini yiwen annect-a: “Ih, atan yad akk yettazzalen ɣef tmaziɣt d azerreg kan. I kunwi d acu i-ken-yeǧǧan ur tettilim ara d Imaziɣen n ddkir, d Imaziɣen n nnif azedgan? Teḍra-yawen am win yennuɣen akkd gma-s dɣa yekker yeǧǧa yemma-s”. Irgazen-a ɛerḍen s wakka ad ffren nnif-nsen i sen-yerɣlin.

Ladɣa ula d nnif-nni n twaɣit akk d tismin i yizedɣen allaɣen n waṭas n tarwa n tmurt-nneɣ d aɣbel ameqqran, yettcekkilen tikli deg webrid n usali n tmurt-nneɣ d asawen. Neqqar daɣen Izwawen warǧin zemren ad dduklen. Awal-a yettcekkil-aɣ tikli i wakken a nadi s tmusni (s wallaɣ mačči s wul kan) a d-naf amek ara neddukkel di tlufa iyessefk a neddukkel fell-asent.

 

Tasertit yessefk ad tili twulen i yidles n tmurt

Zik nettazzal ɣef tutlayt-nneɣ, ɣef idles-nneɣ, maca nettkukru tawuri s yisem n tsertit.Tura yessefk a nẓer war tasertit ur nzemmer ara a neḥrez ayen yelhan deg yidles-nneɣ. Tutlayt-nneɣ ad tenger ma yella tamurt-nneɣ ur tesɛi ara tisuda-ines (institutions) ara ad yeddun fell-as, ad xedment s yes. Amedya: Asɣer n tutlayt tayemmat yezmer ad yili mgal idles n tmurt, ma yella yad yettarran ahil n wesɣer ffɣen-d mgal idles-a. Neẓra llan ula d Yizwawen i yixeddmen mgal idles azwaw, mgal tutlayt tazwawt. Ihi ɣas tura tuɣal tutlat tamaziɣt di Dzayer d tutlayt tunṣibt, ur d-iteffeɣ kra yelhan deg-s ma yella mačči d Imaziɣen ara ad yilin d imdebbren di tmura-nsen. Tasertit yessefk ad tili d tin i wulmen i yidles n tmurt. Yessefk ad tefti daɣen tsekla tazwawt n wakud atrar n tura, war ma yeǧǧa yiwen ayen yellan zik. Ad ilint tɣawsiwin “tiliktruniyin” ad taget tira s tutlayt-nneɣ di “linternet” i wakken idles-nneɣ, tutlayt-nneɣ ad ddun d asawen deg webrid atrar n tura. Ihi iwakken a neddu deg webrid n tmeddurt tatrat s yidles-nneɣ, s tutlayt-nneɣ, yessef a nessemlil idles akkd tsertit deg weḥric n ussudes n tmurt-nneɣ.

 

Ayen yessefk ad ddukkel fell-as Yizwawen

Akken walaɣ Izwawen yessefk ad msefhamen kan ɣef tgejda i yessefk ad tbedd twuri ɣef izerfan-nneɣ. Atentta:

 

Tigejdit 1 Aɣref Azwaw:

Yessefk a d-nini nekni s Yizwawen d aɣref i nella! Aseddu n tmurt-nneɣ s yifassen-nneɣ d azref-nneɣ, d azref n yal aɣref. Annect-a ur yelli ara ɣer wamur ameqqran n tarwa n tmurt-nneɣ. Aṭas n Yizwawen ur cliɛen ara ma d aɣref i llan neɣ d ayen nniḍen.

 

Tigejdit 2: Tutlayt-nneɣ

Yal aɣref ɣur-s tutlayt. Nekni s Yizwawen tutlayt-nneɣ d Tamaziɣt-Tazwawt (Taqbaylit). Yessefk ad tuɣal d tutlayt tamezwarut n twuri (lxedma) di tmurt-nneɣ. Win iran tutlayt-nneɣ ur tnegger ara, yessefk a tt-yemmeslay, a tt-yaru tura yakan! Yessefk ad yeffeɣ wawal ɣer tarwa n tmurt-nneɣ, ula d tutlay-nneɣ tezmer ad tesseɣli aɣrum i tarwa n tmurt, tezmer ad tesdukkel merra tarwa n tmurt-nneɣ. D tutlayt i tigejdit talemmast n yidles-nneɣ azwaw.

 

Tigejdit 3: Tugdut-nneɣ

Ma nessaweḍ kra n was anesɛu tadsimant (timanit) neɣ awanek azwaw yessefk ad yili d tagduda. Tugdut di tmurt-nneɣ mačči n wass-a. Tugdut-nneɣ tessenta iẓuran di yal taddart n tmurt-nneɣ (agraw n taddart (Tajmaɛt)). Yessefk kan tura ad tali ɣer tɣiwanin, ad tili d tigejdit n usbeddi n uwanek azwaw. D acu kan yessefk a nẓer tameddurt n tura mačči am tin n ziɣ-nni. Ihi agraw n taddart yessefk ad yeddu d wakud atrar n tura.

 

Tigejdit 4: Izerfan n wemdan

Izerfan n wemdan yessefk ad ilin d azref n yal amezdaɣ n tmurt-nneɣ, n yal amdan. Argaz tameṭṭut yessefk ad sɛun azref yiwen! Annect-a yessefk ad yensex di tmendawt n tmurt-nneɣ.

 

Tigejdit 5: Tilelli n ddin

Yal amezdaɣ n tmurt-nneɣ, yal amdan ad yizmer ad yamen s ddin i s-yehwan, ad yizmer daɣen ur yettamen ara.

 

Tigejdit 6: Abrid n talwit

Leqdic deg weḥris n tsertit akk d tikli ɣer yiswi n usbeddi n tegduda di tmurt-nneɣ yessefk ad tili s ubrid n talwit, ad tili war adebbuz. Die tmurt-nneɣ llan yad yettwaḥebsen, yetwawten; annect-a ur ten-idemmer ara ad ddmen abrid n imenɣi s udebbuz. Ɣef wakka nekk s iyiman-iw ttzuxxu s tarwa n tmurt-iw di tmurt n Lalman, qqaren nekni s Yizwawen nteddu ɣef izerfan-nneɣ s wawal akk d tira mačči s udebbuz.

Ɣef 6 n tgejda-ayi yessefk-aɣ tadukkli. Ihi ma nefra annect-a, nekkes nnif n twaɣit, nekkes nnefxa, iberdan n tsertit zemren ad ilin mačči yiwen.

 

Anwa i d abrid ay iberdan

Deg weḥrich n leqdic ɣef izerfan n weɣref azwaw yezmer ad yini yiwen llan 3 iberdan:

 

Abrid 1: Tamurt n Dzayer ad teqqim akken tella tura.

Llan yad yeqqaren di tamurt n Dzayer llan Waɛraben, llan Imaziɣen. Ihi yessefk ad ddren akken die yiwet n tmurt, wa ad iqaḍer wayeḍ. Tura (seg tazwara n useggas 2016) atan tamaziɣt tuɣal d tutlayt tunṣibt am taɛrabt. Tamurt tezmer kra n wass ad tuɣal ɣer iẓuran-ins n tidet. Qqaren, a nraju kan kra n iseggasen, tamaziɣt ad tuɣal d tutlayt tamezwarut, d tutlayt n twuri n imezdaɣ n Dzayer merra, ama yella yiwen d amaziɣ, ama d aɛrab neɣ d wayen-nniḍen. Akken nnan imezwura: “Sennig webrid, seddaw webrid, taggara ad tuɣal s abrid.” Qqaren,atan tura anida yedda yiwen ad isel i tmaziɣt. Ula d Aɛraben qqaren “Azul”. Ihi yad yettazzalen i wakken ad ssufɣen tamurt tazwawt (tamurt n Yiqbayliyen) si tmurt n Dzayer qqaren fell-asen d „iderwicen“ i llan.

 

Abrid 2: Tawuri ɣef tedsimant i Tmazɣa Talemmast

Yad iqeddcen deg weḥric-a ttazzalen i wakken tamurt tazwawt ad tsɛu anabaḍ akkdwayen-nniḍen. Anabaḍ-a ad yessudes tilufa n tmurt s yiman-is. Maca tamurt tazwawt ad teqqim deg uwanek adzayri. (Annect-a yella d iswi n “MAK” (Mouvement pour l’Autonomie de la Kabylie). Assa d iswi n “RPK” (le Rassemblement pour la Kabylie) i d-ilulen ass n 24. Meɣres 2017.

 

Abrid 3: Tuffɣa seg uwanek adzayri

“MAK” yuɣal d “Afraniman i Tmurt n Yiqbayliyin” (Mouvement pour l’autodétermination de la Kabylie) Tura yuɣal d amusu yettazzalen ɣef uzarug (indépendance). “Tamurt n Iqbayliyen”, qqaren, yessefk ad tuɣal d tagduda tilellit, ulac tuɣalin ɣer deffir. Qqaren, acuɣer ara ad yedder yiwen d yimdanen ur nettqaḍar izerfan n wemdan, ur nessin d acu i d azal n tugdut.

 

D acu i tifrat?

Idles akk d tutlayt-nneɣ reqqen yal ass drus drus. Tagnit-a ur yessefk ara ad teqqim akka. Ɣas yiwen ur yeẓri amek ara teḍru yid-sen azekka. Dacu kan asirem yessefk ad yili, maca s ucemmer n iɣallen ɣer twuri, ama deg webrid ɣer tedsimat, ama deg webrid ɣer uzarug. A wi yufan Izwawen (Tizwawin) merra ad msefhamen ɣer yiwen webrid deg iberdan yellan. Akka ad sdukkeln tazmert-nsen i wakken a nessiwḍen ɣer yiswi-nneɣ.

Annect-a ur ḥsiɣ ara ad yeḍru. Ihi tegra-d kan yiwet n tifrat. Yal yiwen ad yeddu deg webrid-is. Taggara a nẓer anwa ara ad yesddukkeln imezdaɣ n tmurt, ad yessiwḍ ɣer yiswi-s send wiyaḍ. Tikli deg iberdan-a yemxalafen, ur yessefk ara kan ad tili s imenɣi. Ur yessefk ara wa ad yettruẓu deg wayeḍ. Ur yessefk ara a nettu llan yad yettazzalen iḍ akk d was, iwakken ad rẓen yad/tid yettazzalen ɣef isenfaren-a. Yessefk daɣen a nessemlil irgazen (tilawin) n tsertit yettemcaqlalen gar-asen amcaqlal ur nemɛin. Yessekk a sen-yekkes yiwen nnif n twaɣit, ad frun amcaqlal-nsen i yibedden ɣef nnefxa-nsen. Yessefk ad ẓren tazwawt tezga-d senniɣ-nsen.

Ma d targit n tuɣalin n Dzayer d tamaziɣt, annect-a yezmer ad yeḍru kra n wass, maca tagnit-a tezmer daɣen ad tessenger tutlayt-nneɣ, a nenger nekknik yid-s, war ma nuki i wakka.

 

Awal aneggaru

Aɣref azwaw yezmer tura yakan i tmusni, yezmer i tsertit, yezmer ad yessudes tamurt-is s yiman-is. Annect-a d azref n yal aɣref! Tamurt-nneɣ teččur d imusnawen/timusnawin. Tamurt-nneɣ teččur d agerruj s wacu ara nizmir a nedder s tfenṭazit! Tamurt-nneɣ tecbeḥ! Ula d nekni ɣur-neɣ tugdut, Tugdut tazwawt tuklal tagduda! Am yad/tid yettazzal ɣef tmanit am d wid/tid yettazzalen ɣef uzarug yessefk ad myṭṭafen afus deg ufus ɣef wayen i yesddukkel merra Izwawen/Tizwawin.

«To Be or not to Be: That is the question!» (William Shakespeare).

——————————————————————————————————

Tamawt:

Nekkini lemmer ufiɣ tilaq tutlayt-nneɣ nsemma-yas TAZWAWT neɣ Tamaziɣt-
Tazwawt; tamurt-nneɣ nsemma-yas Tamazɣa talemmast neɣ Tamurt Tazwawt.

Awal “Taqbaylit” nekk yettbin-iyi ur yelhi ara, acku mačči nneɣ.

—————————————————————————————————–

Tasekla:

– (Hanoteau et Letourneux, la kabylie et les coutumes Kabyles 1893.

– “Imaziɣen (Timaziɣin) ger igenni d tmurt” By Akli Kebaili, di The Amazing Voice.

Taɣuct Tamaziṭ. The Newsletter of the Amazing Cultural Association in Amerka.

Volume 6, Summer 1997

– Salem Chaker, Réflexions pour l’autonomie de la Kabylie, Tamazɣa, Paris 2001

– Kabylie. L’Autonomie en débat. Actes du séminaire d Écancourt – France- 1, 2, 3

mars 2002.

– Salem Chaker, Réflexions pour l’autonomie de la Kabylie, Tamazɣa, Paris, Juillet

2001

– Le Mouvement pour l’Autonomie de la Kabylie (MAK):

http://www.babelmed.net/dossier/98-algeria/3445-le-mouvement-pour-l-autonomie-
de-la-kabylie-mak.html

– Etude : Tamazight risque de disparaître:

http://www.kabylie-news.com/2015/04/etude-tamazight-risque-de-disparaitre.html

– A. Akwaw, “Les kabyles doivent s’enttendre sur l’essentiel”, di Tamurt.info,

11.05.2010

– Akli Kebaili, Plaidoyer pour la régionalisation des entités politiques en Afrique du

Nord, di Tamurt.Info, 11.10.2010 : http://www.tamurt.info/fr/plaidoyer-pour-la-
regionalisation-des-entites-politiques-en-afrique-du-nord,666.html

– Akli Azwaw, Azal n tutlayt-nneɣ, TAMURT.INFO 24 JUILLET 2015

– Akli Azwaw, Tugtut Tazwawt Tuklal Tagduda, Tamurt.Info, 31.07.2015.

Partager cet article

Un commentaire - Écrire un commentaire

  1. Nessaram a naweḍ a nekkes tavarda i d rran γef yeεrar nneγ, ma neddukkel am yiwen a nizmir,maca siwa s uzarug ara iḥudden γef wayen i d yeqqimen, tutlayt Tazwat d tmetti talaykit, akk d izerfan n wemdan, ma d timanit a d neggri neţwaqen s umrar a neks kan anda yevγa udavu n Zzayer.

    Répondre
  2. Tamemmirt tameqrant i wAkli Azwaw ghef umagrad-agi.Ayen i d teqarêd d-tidet,d-ayen yellan.Nezmer ad nini d-akken ass-a,askasi ghur iqvayliyen yeddewir gar Tadsimant akked Timunent.Yad îtfen (ickuntêden), deg icûdâd n Ledzayer negh yugin « inevran’ d Ledzayer drus-iten (qlil-iten) acku tamughli nsen ur tesufugh ara.Tikti n Uwanek Aqvayli ilelli tezraâ,yerna ad…temghi !
    Yiwen wawal kan i Iqvayliyen:Tadukli,tadukli ! Acku ad rewlen ma neddukkel !

    Répondre

Post Comment

*